Mars, rikthehen filmat e kineasteve femra

Arkivi
Qëndror Shtetëror i Filmit do të nderojë filmat e regjizoreve gra, duke
shfaqur të pestë të mërkurat e muajit mars, veprat e tyre kryesore.
Shfaqjet do të ndodhin në kinemanë e arkivit, ndërsa muaji mars u zgjodh sepse 8 marsi festohet në Shqipëri si dita e gruas.

Ndonëse
janë të pakta gratë shqiptare kineaste, një pjesë e tyre kanë prodhuar
filma që kanë zënë një vend të rëndësishën në kinematografinë vendase.

Bëhet
fjalë këtu për Xhanfise Kekon dhe disa prej filmave te saj, si “Tomka
dhe shokët e tij”, “Partizani i vogël Velo”, “Kur xhirohej një film”,
apo regjizore të tjera që kanë realizuar dokumentarë, si Marianthi
Xhako, Donika Muçi, Liri Brahimi, Vitori Çeli e Adriana Elini.

Muaji i grave kineaste u çel sot me tre dokumentarë të Marianthi Xhakos. Më 9 mars do të shfaqen tre filma të Donika Muçit.

Më
datë 16 do të ritransmetohen punimet e Liri Brahimit, në 23 mars
prodhimet e Vitori Çelit, ndërsa e mërkura e fundit e muajit do t’i
dedikohet dy regjizoreve që nuk jetojnë më: artistes së popullit,
Xhanfise Kekos dhe dokumentaristes Adriana Elini.

Hyrja është falas, ndërsa filmat do të shfaqen çdo të mërkurë, duke nisur nga ora 12:00, në kinemanë e AQFSH-së.